Ben Madilynn
Usa ka priso sa Lapu-Lapu City Jail tungod sa kaso sa ilegal nga drugas, gidakop sud sa bilanggoan sa kaso nga carnapping human nalutsan sa korte og warrant of arrest.
Ang nasikop sa giila sa kapulisan nga notadong carnapper mao si John Francis Bacalso alyas John Francis Cañete Bacalso, 34, taga Quezon Blvd., Sitio Bato, Barangay Ermita, dakbayan sa Sugbo.
Nabalhog si Bacalso sa naasoy nga bilanggoan sa miaging tuig tungod sa drugas ug niadtong Huwebes sa hapon, Oktubre 3, 2024, gi-serve sa kapulisan ang warrant of arrest batok kaniya sa kasong carnapping.
Si Judge Estela Alma Singco-Caruso sa Regional Trial Court Branch 12 sa dakbayan sa Sugbo maoy niisyo sa warrant niadtong Septiyembre 18, 2024, batok kang Bacalso sa kasong kalapasan sa Republic Act 10883 kun New Anti-Carnapping Act of 2016 nga dunay P300,000 nga gitugot nga pyansa.
Matod ni Police Major Eric Gingoyon, hepe sa Carbon Police Station, nga gawas kasong gilambigitan ni Bacalso sa dakbayan sa Sugbo sa carnapping, aduna pa kini laing mogawasay nga warrant of arrests sa susama nga kaso sa korte sa dakbayan sa Talisay ug lungsod sa Minglanilla.
Matod pa, ang modus sa akusado mao ang pag-abang og sakyanan apan dili na niya kini ibalik sanglit iya na nga ibaligya ngado sa laing tawo.
Samtang, ang kapulisan nipasidaan sa publiko bahin sa pagpalit og second-hand nga sakyanan sa pagseguro nga dili kini kinawat pinaagi sa pagsusi sa mga tukmang dokumento o mosubat sa record sa Land Transportaiton Office (LTO) aron dili mahasol ug maapil sa problema. / AYB
