Ben Madilynn
Gikompirmar sa tigpamaba ug kasamtangan nga deputy city director for operation sa Cebu City Police Office (CCPO) nga si Police Lieutenant Colonel Maria Theresa Macatangay nga nadawat na ni Police Colonel Antonietto Cañete ang iyang order gikan sa Kampo Crame nga nagtudlo kaniya nga direktor sa kapulisan sa dakbayan sa Sugbo ug dili na siya acting city director nga status.
Ang maong order pinitsahan Oktubre 1, 2024 gikan sa Police Regional Office (PRO) 7 Headquarters.
Human narelibohan sa katungdanan si Police Colonel Ireneo Dalogdog isip hepe sa CCPO ug gibalhin sa investigation division sa PRO-7, kasamtangan nga gibutang si Cañete isip acting director.
Lima ka mga pangan ang girekomendar sa PRO-7 kang Cebu City Acting Mayor Raymond Alvin Garcia aron iyang pilian nga mamahimo niini nga pangulo sa kapulisan sa syudad sa Sugbo usa ani si Cañete.
Daghan ang mga pagsuway nga nasugatan si Cañete human siya milingkod nga acting director tungod kay gisugat kini og dakong tulis sa Barangay Ermita diin ang duha gyud ka jewelry stores ang gibiktima sa mga tulisan.
Dali ra hinuon nga nailhan ang mga suspek ug duna dayoy nadakpan sama sa drayber sa getaway vehicles ug ang drayber sa habalhabal nga taga Barfangay Lahug nga nakita sa CCTV camera.
Kini ang usa sa mga nag-unang rason nga nitudlo si Garcia kang Cañete nga mamahimong regular nga city director sa kapulisan sa dakbayan sa Sugbo. / AYB
