Ben Madilynn
Gitanggong sa prisuhan ang usa ka masahista nga buta human kini gipasanginlang naglugos sa iyang ka boardmate nga “partially blind” mga alas 12:00 sa tungang gabii, Mayo 23,2025 sa may Barangay Apas, Dakbayan sa Sugbo.
Ang gireklamo mao si alyas Rony 44,lumad nga taga P-2 Doyos Carrascal, Surigao del Sur apan kasamtangang nagpuyo sa Apas.
Samtang ang biktima nailhan lang sa alyas nga Charie 22, usa usab ka masahista, lumad nga taga Camotes apan temporaryong nangabang sa susamang lugar sa suspek.
Sa gihimong imbestigasyon sa Mabolo Police Station, ang maong suspek gikuha sa kapulisan sa mall nga iyang gitrabahuan human ang biktima nangayog tabang kay siya giamong-amungan.
Atol sa interbyu sa kapulisan ngadto sa biktima, nisaysay kini nga gipugos siyag hilabot sa suspek nga wala iyang pagtugot ug gihulga siya nga patyon kung mosyagit o mutug-an.
Sa habig ni Rony, niangkon kini nga dunay nahitabo kanila dili kay kausa kundi katulo na kahigayon apan wala niya gipugos ug gihulga ang biktima sukwahi sa gisaysay niini sa kapulisan.
“Katulo naman naay nahitabo namo maong abi nakog okay ra niya. Mao na akong gikatingad-an nganong wala ko niya idemanda sa sinugdanan.”
Ang suspek nibutyag usab nga niadtong Martes, unang higayon nga naay nahitabo nila sa biktima nga nag-inom sila.
Giingong niangkon ang babaye nga 4 ka buwan na siyang mabdos ug gidaygan sa suspek nga andam siyang mahimong amahan sa bata bisan dili kini iyaha sanglit nahigugma jud siyag tinud-anay sa biktima.
Nidugang si Rony nga dugay na siyang naibog sa biktima ug nanguyab niini tungod kay tapad ra sila og kuwarto sa giabangan nilang balay diin usahay magdungan pa sila og kaon.
Dako nalang iyang katingala nga gipapriso siya sa biktima tungod gipanamastamasan niya kini ug gisumbag pa.
Hugot nga nidepensa ang suspek sa pasangil batok niya sanglit gatuo siya nga sinabutan ang nahitabo kanila apan nangayo kini og pasaylo ngadto sa biktima. Niangkon usab kini nga gamahay siya sanglit aduna siyay asawa ug nadala gyud siya sa tentasyon. / JDG
Source: Buta nga masahista ‘nanglugos’ sikop
