Brgy. Konsehal ‘gikulata’ sa paryente nga usa ka politiko

NIDANGOP sa Station 1 sa Mandaue City Police Office ang konsehal sa Barangay Alang-Alang, Siyudad sa Mandaue, niadtong alas 2:40 sa hapon, Martes, Hunyo 3, 2025, nga nipasangil nga gikulata sa giingong ig-agaw sa kanhing opisyal sa Mandaue City nga nagpapili sa miaging eleksiyon apan napilde. 

Ang maong reklamante giila nga si Noel Quemque Flores, hingkod ang pangidaron. 

Sigon sa saysay ni Flores nga mga alas 12:50 sa kaadlawon, Martes, Hunyo 3, 2025, samtang siya natulog sa ilang balay sa SB Cabahug Street, Barangay Ibabao, Dakbayan sa Mandaue, nakadawat siya og tawag sa iyang cellular phone sa suspek nga iyang giila nga usa ka Ian. 

Matod pa nga buot siya nga pagawson sa ilang balay ug nagpaabot ang maong suspek kay aduna silay panag-istoryahan.

Sa pagtuo ni Flores nga maayo ra ang intensyon sa pagtawag kaniya sa pagtuo nga buot sa suspek nga makig-uli hinungdan nga wala siya magduhaduha sa pakigkita sa maong caller. 

Wala matino kon unsay bangi sa duruha.

Apan nasayop si Flores sa iyang pagtuo kay matod pa nasuko na hinuon ang suspek ngadto kaniya ug gihinganlan siya nga arogante.

Wala magdugay usa ka lalaki nga nagmotorsiklo ang niabot og gihapsan ang biktima sa helmet ug wala pa matagbaw, gikulata sab siya ni Ian sa makadaghang higayon. 

Ang biktima nakaangkon og gisi sa iyang wala nga bahin nga kilay ug natuto ang iyang ngabil, base sa natala sa police blotter. 

Sa pagkutlo ning balita, wala pa moluwat og pamahayag ang kampo sa supek kalabot sa maong pasangil ug kasong physical injuries ang isang-at nga reklamo batok ni Ian. / AYB