‘Boy Tapang’ nalutsan og warrant, mitahan

Boluntaryo’ng nitahan sa kapulisan ang kontrobersyal nga blogger nga si Ronnie Suan o mas nailhan nga si “Boy Tapang” human nalutsan og warrant of arrest nga giisyu niadtong Mayo 26, 2025 ni Judge Maria Ella Cecilia Dimaandal Dumlao-Escalante, sa Regional Trial Court (RTC) Branch 143 sa Cainta, Rizal.

Ang mga sakop sa City Intelligence Unit sa Cebu City Police Office nga gipangulohan ni Police Captain Christopher Irwin Sanchez maoy ni-serve sa warrant of arrest batok ni Suan sa alas 12:15 sa udto sa Biyernes, Mayo 30, 2025 sa Barangay Carreta, Dakbayan sa Sugbo.

Ang 25 anyos nga si Suan nga lumad nga taga Daanlungsod sa Lungsod sa Alcoy nitahan usab dayon sa mga otoridad.

Si Suan nag-atubang og kasong kalapasan sa Republic Act 9262 o Violence Against Women and Children’s (VAWC) .

Hinuon, gitugotan siya sa korte nga makapiyansa og P72 mil alang sa iyang temporaryong kagawasan.

Niadtong Abril 1, 2025, gibilanggo usab si Suan sa Alcoy Police Station human matod pa gidagmalan ang iyang kapuyo.

Apan gibuhian ra usab siya pagka-Abril 3, 2025, kay nakapiyansa og P3,000 sa reklamong VAWC sa korte sa Lungsod sa Argao.

Ang kapuyo ni Suan nipasangil nga gibun-og siya sa naulahi.

Apan gihimakak kini sa content creator.

Matod niya nga iya lang gibadlong ang iyang kapuyo nga dili manigarilyo gamit ang vape, sanglit bag-ohay lang kining nanganak, apan nisangko kini sa ilang panaglalis. / GPL