Blended learning ipatuman kon kaso sa Mpox mograbe

Mobalik sa blended learning set-up ang Department of Education (DepEd) kon mograbe ang kaso sa Monkeypox.

Si DepEd 7 Director Salustiano Jimenez sa interview niadtong Martes, Hunyo 3, 2025, nagkanayon nga andam nilang ipatuman ang alternative learning modalities base sa kasinatian nila atol sa Covid-19 pandemic.

“Automatic, it will shift to blended, online, or modular,” matod ni Jimenez.

Matod niya nga ang DepEd nagmando na sa tanang eskuylahan nga seguruhon ang pagpahimutang sa mga safety protocol sa dili pa mobalik ang mga tinun-an sa klase.

Ang mga protocol naglakip sa pag-monitor sa mga estudyante nga mopakita og symptoms.

Matod ni Jimenez nga ang mga protocol sama sa makanunayon nga pag-inom og tubig, paglikay sa tapuk-tapok ug ang pag-report sa mga symptom kinahanglan nga ipahibalo ngadto sa mga tinun-an.

Matod ni Jimenez nga ang bisan unsang suspected cases kinahanglan nga ipahibalo dayon sa kadagkuan sa tulonghaan.

Kini maong pahimangno kabahin sa orientation sessions sa mga ginikanan isip precautionary measure.

“These are the things that we spread, and we are also awaiting advice from the DOH,” dugang ni Jimenez. / JPS