Ben Madilynn
Nakamatngon ka sa linog niadtong miaging Dominggo?
Kining linog usa sa mga mangtas nga katalagman nga magdala og dakong salaot di lang sa mga kabtangan labi na gayod sa kinabuhi.
Diay akong itampo nga mga angay andamon ug buhaton kung simbako lang moabot kini.
Ayaw kalimot sa flashlights nga de baterya ug extra nga bag-ong baterya, first aid kit nga naay kumon og madali-dali nga tambal para sa kalibanga, sakit sa ulo, hilanat og uban pa. Gamit sab kaayo ang portable nga de bateryang radyo.
Pag pundo og tubig ingkaso way kuryente.
Paglain og ‘Ready to Go’ nga emergency bag nga imong mabitbit ingkaso og pabakwiton.
Sudli kini og habol, toalya, pipila ka sinena, importanting papeles, cash, de lata nga pagkaon o noodles, biscuits, gatas o pagkaon para sa bata og gaan nga lutoanan og tubig.
E-meeting ang kabanay aron di magkatibulaag og magpangitaay. Sabuton daan og asa mag-abot panahon sa kalamidad labi na og di mogana ang mga cellphone kay way signal.
Likayi ang pagtongtong sa ibabaw sa mga bug-at nga butang kay delikado kining maka-igo kung mahulog inig uyog.
Kung maabtan sa linog, ayaw ka ratol.
Kun ugaling naa sa sulod sa balay, palayo sa bongbong unya patungod hinuon sa portahan o kamang o tago sa ilawom sa lamisa o lig-on nga furniture aron ma protektahan imong lawas ug ulo.
Ayaw paduol sa bildo nga bintana kay segurado kining mangabuak inig uyog sa yuta.
Kung maabtan sa guwa, dagan sa hawan unya palayo sa mga linya sa kuryente o mga dagkong kahoy og edipisyo kay kuyaw kining mangatumba.
Kung ikaw nagsakay, ipundo usa ang sakyanan unya padayon og pasilong sa sulod hangtod nga mo hurang ang uyog.
Kung naa sab ka sa tag-as nga building, ayaw paggamit sa elevator kundi hagdanan.
Human sa linog duna pa ni mga ginangmay nga after shocks busa ayaw og kompiyansa. Tan-awa kung duna bay nangasamad unya hatagi dayon og first aid.
I-check sab inyong tubig, kuryente og gas kung duna bay damage.
Pagpakabana ug pamiaw sa mga balita sa radio aron masayod og magiyahan sa mga awtoridad.
