abyasa
LAOAG CITY – Mamati ni Fire Superintendent Roxanne Parado, Provincial Fire Marshal a panawenen tapno maaddaan ti Ilocos Norte ti high rise ladder nangnangruna kadagitoy a gundaway nga umad-adu dagiti nangangato a pasdek.
Inpaayna nga ehemplo ti Dap-ayan Commercial Complex pakairamanan dagiti sumagmamano nga hotel ditoy siudad ti Laoag ken kangrunaan a dinakamatna ti Mariano Marcos Mememorial Hospital and Medical Center.
Inlawlawagna a no adda dagiti saan a mapakpakadaan a pasamak kadagiti nadakamat a pasdek ket awan ti mabalin nga usaren ti Bureau of Fire Protection ditoy probinsia.
Mainaig iti daytoy, kiniddawna ti suporta ni Gob. Matthew Marcos Manotoc para iti panangkiddaw ti probinsia iti gobierno nasional a mangipaay iti maiyasping a kagamitan iti Bureau of Fire Protection Ilocos Norte.
Kunana a kadagitoy a gundaway ket adda ti tignay ti Bureau of Fire Protection a mangipapaay kadagitoy a kagamitan kadagiti lugar nga agkasapulan.
Kabayatanna, inpanamnama ni Bokal Gian Carlo Crisostomo, Chairman ti Peace and Order iti Sangguniang Panlalawigan a mangipasa iti resolusion pakaseknan daytoy a banag.
Mamati a dakkel daytoy a tulong tapno mapatgan ti kiddaw ti probinsia a maaddaan ti high rise ladder.
