Bercede midepensa sa 11K nga kawani sa Mandaue City Hall

GIPANALIPDAN ni outgoing Mandaue City Mayor Glenn Bercede ang pagpatrabaho sa dul-an 11,000 ka personnel sa City Hall ug nangatarungan nga nisubay kini sa balaod ug sa limitasyon sa budget.

Ang umaabot administrasyon ni Mayor-elect Jonkie Ouano nakugang sa nanghinubra nga mga trabahante sa City Hall.

Si Bercede sa interview niadtong Miyerkules, May 28, 2025, nagkanayon nga ang gasto sa siyudad sa  personnel services (PS) pabiling anaa sa 45 percent ceiling nga gimando sa Local Government Code sa 1991. 

Matod niya nga bisan sa maong gidaghanon sa mga trabahante, wala sila molapas sa gitugot sa balaod.

Gitumbok ni Bercede ang 2025 annual budget, nigahin og P938.96 milyunes alang sa suholan sa mga kawani ug kini 20.87 percent lang sa kinatibuk-an nga P4.5 billion budget sa Mandaue.

Giila ni Bercede nga dunay mamahimong kausaban sa paglingkod na unya ni Ouano tungod kay kabahin man kini sa panggobiyerno.

“Masabot ra man gyud na nga sa bag-ong liderato duna gyuy pagminos unya sa mga empleyado,” matod ni Bercede.

Iyang gidugang nga ang tanang gipatrabaho nga job order workers, casuals, Clean and Green personnel, ug Planning and Development Office (PDO) staff nakadawat sa ilang suweldo nga nituman gyud sa ilang mga gitahas nga trabaho.

Sayo niini, ang transition team ni Ouano nga gipangulohan ni incoming City Administrator Atty. Sally Malig-on nipadayag og kabalaka sa nanghinubra nga mga trabahante. Matod ni Malig-on nga base sa ilang pag-review, nagsuweldo ang Mandaue og dul-an 11,000 ka trabahante nga duna lay mga 1,000 nga naghupot og permanenting posisyon.  Giinsister ni Malig-on nga mas makadaginot ang siyudad og gatusan ka milyunes kon minos lang ang mga trabahante ug ang ma-save mahimo pang gamiton sa mga batakang serbisyo sama sa healthcare, medicines, ug hospital infrastructure.

Usa sa mga gitutokan sa transition team mao ang  Purok Development Office (PDO) nga nipatrabaho og kapin sa 5,000 ka mga tawo.

Sa maong gidaghanon, 639 giila nga mga PDO official nga nagdawat og P4,500 matag buwan samtang ang 4,500 ka mga miyembro dunay tag P1,000 matag buwan. 

Gikuwestiyon ni Malig-on ang mga trabaho sa maong mga tawo ug nagduda nga gigamit ra gyud sa politika.

Si Bercede nanalipod nga ang mga PDO dunay importanteng mga tahas diha sa ilang komunidad.

 “Sa akong opinion, dako sila’g gikatabang. Kana nga grupo (PDO) natukod panahon ni mayor Jonas Cortes. It’s an important group not just in Mandaue, but in many cities and municipalities across the country,” matod ni Bercede. 

Si Malig-on nagkanayon nga ang hingpit nga pag-review sa mga trabahante sa City Hall mahibaw-an sa paglingkod na unya ni Mayor-elect Ouano sa Hunyo 30. / CAV