Ben Madilynn
Nalandig sa tambalanan ang usa ka 20 anyos nga lalaki human pusila pasado alas 11 sa gabii, Martes, Oktubre 1, 2024 sa Sitio Lahing-Lahing 2, Barangay Mabolo, Dakbayan sa Sugbo.
Ang biktima mao si Elgen Robisano, nagpuyo sud sa Ludo Cemetery sa Barangay Carreta, Siyudad sa Sugbo, samtang ang suspek sa pagpamusil iya ra usab nga kaila nga wala lang una nganli sa kapulisan tungod sa ilang padayong operasyon atol ning pagsuwat.
Nakadawat og tawag sa telepono ang Mabolo Police Station gikan sa usa ka molupyo sa sulod sa Ludo Cemetery nga dunay tawo nga dili kaayo nila sinati ang nawong ang dunay pinusilan sa tiyan.
Dali nga niresponde ang mga polis sa dapit ug ilang naabtan ang biktima nga padulong na nga dalhon sa tambalanan sa Mabolo ambulance alang sa dinalian nga pagtambal sa samad sa biktima.
Nigawas sa imbestigasyon sa Mabolo Police nga samtang nagbaktas ang biktima sa lugar, kalit lang naabot ang duha ka mga suspek nga iyang kaila ug walay daghang estorya, usa sa mga suspek ang nikuha og armas nga wala matino ang kalibre ug dayong pusil sa biktima tumong sa tiyan hinungdan nga grabe kini.
Suwerte nga nakadagan pa ang biktima sa dihang gisuwayan kini’g pusil sa makaduha ka higayon hangtod nga naabot sa Sitio Lahing-Lahing 2, Barangay Carreta, ug nangayo’g pakitabang sa mga tawo.
Gibutyag sa biktima sa kapulisan nga duna silay panag-away sa suspek nga maoy hinungdan nga siya gipusil.
Ang Mabolo Police Station sa pagpangulo ni Police Major Romeo Caacoy Jr. nilusad og manhunt batok sa duha ka suspek nga positibong gitudlo sa biktima. / AYB
