Ben Madilynn
Pinaregta ni House Quad Comm Leader ken Surigao del Norte Representative Robert Ace Barbers ti Department of Justice (DOJ) a mangipila iti kaso a murder kontra kadagiti retirado a polis a da Colonel Royina Garma ken Edilberto Leonardo mainaig iti 2020 ambush kontra kenni retired police General Wesley Barayuga.
Segun kenni Barbers, nasinged ti koordinasionda iti DOJ ken addan dagiti pannakabagida a mangmonitor iti panagdengngegda nangruna ken ipalgakda ti maysa a krimen.
Dakdakamaten ni Barbers ti impalgak da Police Lieutenant Colonel Santie Mendoza ti Philippine National Police Drug Enforcement Group ken Nelson Mariano, a maysa a drug informant ni Mendoza, nga da Garma ken Leonardo ti adda iti likudan ti pannakapapatay ti dati nga opisial ti Lotto.
Impaganetget ni Barbers kadagiti nadakamat a rebelasyon a rumbeng nga agtignayen ti DOJ ken mangipila iti kaso kontra kada Garma ken Leonardo.
Kabayatan ti Quad Comm hearing idi napan a Biernes, insingasing ni Surigao del Sur Representative Johnny Pimentel a mairaman iti report ti komite ti rekomendasion a maidarum iti dua a sigud nga opisyal.
Sakbayna, nangiruar ti PMA Matikas Class of 1983 iti statement ken dinayawda ti Quad Comm gapu iti panagruar ti tao ti likudan ti pannakapapatay ni Barayuga.
Ni retired police General Wesley Barayuga ket kameng ti PMA Class 1983.
