Bana namatay sa adlaw nga ilubong ang asawa

“TILL death do us part.” 

Wala nay mas sakit pa sa gibati sa duha ka bata nga nailo sa magtiayong Conel human kini sunod-sunod nga namatay.

Ihatud na unta sa pamilya ni Junifel Conel ang namatay niyang asawa sa sementeryo dihang naaksidente kini sa National Highway sa Barangay Kilada, Matalam, North Cotabato alas 6:00 sa buntag, Sabado, Mayo 31.

Kauban ni Junifel ang iyang anak dihang nabangga ang gimaneho niyang sakyanan sa 10-wheeler truck sa nahisgutang  dapit.

Tibuok gabii nga nagpulaw si Junifel sa lubong sa iyang asawa ug nilakaw sila sa iyang anak pagkabuntag aron mamalit og ice.

Tungod sa kakusog sa impak, nawad-an og panimuot si Junifel ug daling gidala sa balay tambalanan lakip ang iyang anak.

Samtang gihimo ang misa sa lubong sa iyang asawa sa wala pa ilubong sa Amas, Kidapawan City, si Junifel gitabang sab sa ospital.

Human sa pipila ka oras nga pakigbugno sa kinabuhi, gideklarar siya nga namatay. 

Dako ang kasubo sa pamilya ug mga kauban ni Junifel sa Cotabato Provincial Engineer’s Office sa nahitabo kaniya. (Edgar E. Fuerzas)