Balay ni FPRRD di na paduawan

GISIRA ang balay ni kanhi President Rodrigo Duterte sa Doña Luisa Village alang sa mga turista ug bisita taliwala sa nagtaas nga mga kaso sa monkeypox (mpox) sa Davao City.

Sa usa ka resolution letter nga gipagawas sa Doña Luisa Homeowners Association (HOA) ngadto kang Randy Usman, kinsa maoy piniyalan sa mga indibiduwal sa panimalay ni Duterte, gikanayon sa HOA nga human sa masusing deliberasyon ug pagtuon sa kahimtang sa lugar, giimposar nila ang “cease and desist” order sa tanang mga kalihukan nga gihimo dinhi aron pagpakgang sa kontaminasyon ug transmisyon sa mpox.

“Despite our desire to protect the territory of our dearly beloved Duterte family, but as per assessment the current situation does not warrant for us to tolerate the continuation of the visitation activity for everyone’s welfare, safety, and protection,” matud sa HOA.

Gipahimug-atan sa HOA nga ang mpox usa ka seryuso nga public health concern, uban ang mga kasong kasamtangang gimonitor sa Southern Philippines Medical Center (SPMC). Ilang subling gitin-aw nga ang pamaagi usa ka “precautionary step” dili lang alang sa kaluwasan sa mga molupyo apan alang sab sa mga bisita kinsa mahimong mameligro nga matakdan sa kagaw pinaagi sa “skin-to-skin contact”.

Sayo niini, ang gihangop sa City Tourism Operations Office (CTOO) ang ideya sa paghimo sa balay sa kanhi presidente nga tourist attraction. Si Jennifer Romero, officer-in-charge sa CTOO, nagbutyag nga kini nga inisyatibo makatabang sa pagpakusog sa sektor sa turismo sa siyudad. 

Kahinumdoman, gipaambit ni Vice President Sara Duterte nga iyang gisuhestiyon ang ideya sa pagkonberter sa balay ngadto sa tourist attraction kang Honeylet Avanceña, ang common-law nga asawa sa iyang amahan. 

Gikompirma sa City Health Office (CHO) nga dunay unom ka mga kaso sa monkeypox sa Davao City sukad Mayo 2025. Sa maong ihap, upat niini aktibo apan lig-on ang kahimtang, usa ka pasyente nakarekober na, ug usa namatay tungod sa komplikasyon nga walay kalabutan sa mpox.

Samtang gitaho sab sa SPMC nga ilang gimonitor ang pito ka mga pasyente nga gisuspetsahan nga dunay mpox. Sa maong ihap, tulo gikompirmang positibo basi sa resulta sa pagsusi gikan sa Research Institute for Tropical Medicine (RITM) sa Manila.

Gitin-aw sa SPMC nga sa pito ka mga pasyente, upat niini gikan sa Davao City (nagtandi sa upat nga gitaho sa CHO), duha gikan sa Davao del Sur, samtang ang lokasyon sa nahabiling kaso wala gibutyag. Sukad Abril 10, 2025, nakatala ang SPMC og kinatibuk-ang 14 pasyente nga dunay mpox, pito niini gipapauli na. 

Sumala sa World Health Organization (WHO), ang mpox usa ka makatakod nga sakit tungod sa kagaw sa mpox. Kasagaran nga sintomas naglakip sa kalintura, pagpanakit sa kaunoran, paghubag sa tutunlan, ug butoy-butoy nga hinay-hinay nga mokatag gikan sa nawong ngadto na sa ubang mga parte sa lawas. (Rojean Grace G. Patumbon)