Babaye’ng drug pusher gi-buy-bust, gidakop

Nagtingkagol sa prisuhan ang usa ka 21 anyos nga babayeng drug pusher human kini nakuhaan og pinakete sa gituohang shabu sa  Barangay Tejero, Siyudad sa Sugbo niadtong, Mayo 28, 2025. 

Ang nasikop mao si alyas Babes walay trabaho ug residente sa Belgium St.,Barangay Suba,Cebu City. 

Subay sa imbestigasyon sa Waterfront Police Station, malampusong nadakpan ang maong babaye atol sa gipahigayon nga buy-bust ubos sa pagdumala ni Police Major Mark Don Alfred Leanza inabagan usab sa PDEA-7. 

Dunay nakahatag og impormasyon sa kapulisan nga taudtaod na nagbuhat sa ilegal nga kalihukan ang maong suspek. 

Si alyas Babes giisip nga street level individual nga drug personality, nasakpan sa akto ug nakuha sa iyang posisyon ang pipila ka mga pakete sa gituohang ilegal nga drugas ingon man ang P200 nga buy-bust money ug uban pang mga ebidensya. 

Ang nasakmit nga gituohang shabu gikan ni Babes dunay gibug-aton nga 3 gramos ug nagkantidad kinig kapin P20,000 ug gisumitir sa Regional Forensic Unit 7 alang sa dugang eksaminasyon. 

Kasong kalapasan sa Sec. 5 & 11, Article II of RA 9165 o kalambigitan sa ilegal nga drugas ang atubangon sa maong suspek. / JDG