Ben Madilynn
DUGTA na ang patay’ng lawas sa babaye dihang napalgan sa sapa sa Purok Nangka, Barangay Pangi, Maco ala 1:00 sa udto, Oktubre 4, 2024.
Gibutyag nga ang patay’ng lawas positibong giila nga mao ang 21-anyos nga si Marian Ponce Perez nga molupyo sa Barangay Taglawig, Maco.
Giila ang biktima sa iyang kapuyo nga si Edcil Sabala Duazo, 26-anyos, kinsa nagsulti nga ang iyang kapuyo, nahanaw sukad pa niadtong Septyembre 7 dihang mitabok sa sapa taliwa sa Purok 4A, Magdum ug Barangay Tanlawig nga niadtong higayona, kusog ang bul-og sa tubig sapa, kauban ang tulo ka tuig nga anak.
Si Perez, sumala pa, nadakin-as ug nahagbong sa sapa ug gianod sa makusog nga bul-og sa tubig. Hinuon ang anak niini wa maapil pagkaanod.
Giingon nga ang tulo ka mga menor de edad nga pulos molupyo sa Purok Santol sa nahisgutang barangay nga nagdula-dula niadtong higayona mao ang naka-diskubre sa maong patay’ng lawas sa biktima.
Usa sa tulo ka minor de edad misumbong sa ilang iyaan nga si Myrna Bulaquina ug ang maong iyaan mao ang nagpahibalo sa barangay opisyal kabahin sa patay’ng lawas nga nakaplagan sa iyang pag-umangkon.
Patay’ng lawas ni Perez gipahiluna na sa Rubio Funeral Homes nga nahimutang sa Visayan Village, Tagum City. (Dexter T. Visitacion)
