Ben Madilynn
Nangaangol ang lima ka mga call center agent human nga ang ilang gisakyan nga awto ang nalimbuwad, alas 9:05 sa gabii, Lunes, Septiyembre 9, 2024 sa N. Bacalso Avenue, Mananga Bridge sa Barangay Lawaan 2, dakbayan sa Talisay.
Base sa pasiunang imbestigasyon sa traffic police sa Talisay City nga giingong nakatagpilaw ang drayber samtang nagmaneho hinungdan nga milahos sa rail guard sa maong tulay ug mibalitok ang awto.
Ang mga biktima gilangkuban sa tulo ka mga ulitawo ug duha ka mga dalaga nga nagpangidaron og 28 anyos ngadto na sa 24 anyos.
Nasayran nga ang mga sakay gikan sa Simala, lungsod sa Sibonga ug nagbiyahe pauli sa dakbayan sa Sugbo niadtong higayona.
Gituohan nga tungod sa kakapoy sa ilang biyahe nakapiyong ang drayber sa awto hinungdan nga nakasugat og disgrasya.
Maayo nalang nga way nakalas sa maong hitabo samtang ang mga sakay ang gidala sa tambalanan sakay sa City of Talisay DRRMO ambulance.
Samtang, ang nalimbuwad nga awto ang gitabangan og pagbarog sa mga sakop sa Bureau of Fire and Protection (BFP) sa aron mapadaplin ug dili makababag sa trapiko. / DVG
