Athletic Scholarship ti PGIN, agtultuloy

LAOAG CITY – Agtultuloy ti athletic scholarship ti Provincial Government of Ilocos Norte (PGIN).

Segun ken ni Mr. Faivo Bartolome, Sports Consultant ti gobierno probinsial, uray idi kangitingitan ti pandemia gubuay ti COVID-19 ket nagtultuloy ti nasao nga scholarship program ti probinsia.

Inbatadna a saan a pulos a napukaw gapu ta maysa daytoy kadagiti naiget a supsuportaran ni Gob. Matthew Marcos Manotoc.

Inlawlawagna nga iti daytoy nga school year ket adu dagiti nakastrek ken namnamaenna a dagitoy ti kaadduan agsipud ta mapattapatta nga umabot iti nasursurok ngem sangagasut.

Kunana a daytoy ket agsipud ta adu dagiti nangabak iti kallabes a national competition pakairamanan dagiti nakastrek iti finals ti Philippine Series, dagiti nangabak iti Region 1 Atletic Association Meet ken dadduma pay.

Innayonna a nupay saanna a masigurado ti aw-awaten dagiti nadakamat nga iskolar ket inpasiguradona a dakkel met ti maaw-awat dagitoy nga stipend.