Asawa ti Pinay nurse a ni Reyna Jane Ancheta a pimmusay sadiay Abu Dhabi, mangnamnama a maammoanna ti kinapudno iti napasamak kenkuana
Ben Madilynn
Mangnamnama ni Kenneth Paul Ramel Ancheta, asawa ti Pinay nurse a ni Reyna Jane Ancheta a pimmusay sadiay Abu Dhabi a dagus a maiyawid ti bagi daytoy iti pagilian.
Iti eksklusibo a panakiuman ti Bombo Radyo kenni Kenneth Paul Ramel Ancheta, namnamaenna pay a mapatgan ti kiddawna nga adda ti family member a mangkadua kenkuana paturong sadiay Abu Dhabi tapno ammoenda ti pudno a napasamak iti asawana.
Sigun kenni Ancheta, magul-guloan ti panunotna rason a posible a saan a makadesisyon a dagus daytoy nu agturong iti nasao a pagilian inton Biyernes.
Maipalagip a ni Reyna Jane Ancheta ket naireport a pimmusay gapu iti vehicular accident.
Nu pay kasta, adda dagiti banag a kayat a malawagan ni Paul agsipud ta manu nga aldaw a napukaw daytoy sakbay a naibaga a naaksidente daytoy rason ti ipupusayna.
Imbinglay ni Paul a ti maudi a message ti asawana kenkuana ket nakaawid daytoy iti boardingda ken aglaba sakbay a maturog.
Kalpasan ti nasao nga aldaw, awanen ti naaw-awat a video call ni Paul manipud kenni Reyna nu sadino masdaaw daytoy gapu ta kanayun ti interaksyonda.
Gapu iti dayta, kinontakna ti barkada ti asawana ken ditoy a naipakaamo a rinumwar daytoy kaduana ti barkadana para iti dinner ngem nagsina dagitoy kalpasan ti pinanganda.
Ditan met ti naudi a nakakitaanda kenkuana ken saan met laeng daytoy a nagawid.
Iti panakapukaw ni Reyna, naisubmitir ti police report ken dita a naamoan a daytoy ket naaksidente iti maysa a highway paturong sadiay Dubai.
Awan ti kanayunan a detalye a naipakammo kenni Paul gapu ta kasapulan a personal a daytoy ti mang-ammo nangruna ket strikto ti pagannurotan ti nasao a pagilian.
Kabayatanna, immuna nga impasigurado ti Department of Migrant Workers (DMW) ti dagus a pannakaiyawid ti bangkay ti pimmusay a Pinay Nurse manipud Abu Dhabi.
Malaksid iti dayta, inkari pay ti gobierno ti Pilipinas a mangipaay dagitoy iti assistance iti nasao a pamilya.
