Archival misaad nga humanon ang CCMC sud sa 1 ka tuig

Gitinguha ni Mayor-elect Nestor Archival nga mahuman ang konstruksyon sa dugay nang nalangan nga Cebu City Medical Center (CCMC) sulod sa usa ka tuig.

Sa usa ka news forum, gibutyag ni Archival nga usa sa mga problema nga iyang nakita sa mga pagkalangan sa pagtukod sa tambalanan nga gipanag-iya sa siyudad mao ang pagbahinbahin sa mga panahon sa konstruksyon.

Ang konstruksyon gihatag usab sa lainlaing mga kontraktor sa lainlaing mga panahon, matod ni Archival.

Nakita kini ni Archival nga problema sa accountability hilabi na kon kinsa nga kontraktor ang manubag tungod sa nagkalainlaing problema sama sa structural integrity.

Laing problema mao nga ang pagbahinbahin sa pundo alang sa proyekto ug ang mga pagbag-o sa disenyo nakadugang sa gasto sa wala pa mahuman nga tambalanan.

Dugang pa ni Archival nga ang konstruksyon sa CCMC nagsugod uban sa laing duha pa ka mga tambalanan sa maong dapit, hinuon ang laing duha ka mga pasilidad nahuman na samtang ang CCMC wala pa.

“Until now, it remains unfinished and the problem is we chopped down the budget. The moment we have funds, we will push for it and we will put a completion date,” batbat ni Archival.

Giingon ni Archival nga ang kagamhanan sa siyudad nigasto na og kapin sa P1 billion apan ang unang tulo pa lang sa 10 ka mga andana nga building ang operational.

Nagsugod ang konstruksyon sa CCMC kapin sa usa ka dekada na ang milabay human ang daan nga edipisyo, nga duha ka mga andana, nakaangkon og structural damage human sa linog sa Bohol niadtong 2013.

Matod ni Archival nga sa iyang paglingkod sa Hunyo 30, maghimo siya og team nga mosusi sa kinatibuk-ang mga plano ug transaksyon o usa ka construction audit sulod sa tulo ka bulan.

Human niini magsugod na ang konstruksyon ug mahuman ang 10 ka andana nga building sulod sa usa ka tuig.

Ang team mag-audit sa pinansyal ug timeline sa konstruksyon ug ipunting kini sa paghuman sa tambalanan.

“I promise with Tommy Osmeña and the rest of the team that we are going to finish CCMC in a maximum of one year,’ asoy ni Archival.

“We need to clear it out with the consultants and designers kon kinsa man gyud responsibility if ever there will be something that’s happening in the construction like in the structural or architectural.”

Dugang pa ni Archival nga ang ilang tumong mao ang paghatag og healthcare ug hospitalization benefits alang sa mga lumolupyo sa dakbayan. / EHP