Archival midasig sa composting

GIKAHINUGON ni Mayor-elect Nestor Archival ang dako kaayo nga gasto sa kagamhanan sa Dakbayan sa Sugbo sa paghipos sa basura nga mokantidad og P600 milyunes kada tuig.

Moabot lang og P100 milyunes ang buhis nga nakolekta sa siyudad matag tuig gikan sa mga kompaniya nga nagbayad og garbage fee.

Tungod niini, gidasig ni Archival ang katawhan  nga mosugod og composting diha sa ilang tagsa-tagsa ka balay aron ang mga malata nga basura masagol sa himuon nga abuno sa yuta.

Gitambungan ni Archival ang duha ka adlaw nga Stakeholders Mapping and Dessimination Workshop nga gipasiugdahan sa Ecowaste Coalition sa Mayo27-28, 2025, sa usa sa mga hotel sa Dakbayan sa Sugbo.

Nanambong sa kalihukan ang Cebu-Inayawan Resource Collectors Association (Circa) sa Barangay Inayawan, taga Barrio Luz, Department of Interior and Local Government (DILG), Cebu City Environment and Natural Office (Ccenro), Department of Science and Technology (Dost), Technical Education Science and Development Authority (Tesda), Department of Labor (Dole) ug Department of Trade and Industry.

Gihagit ni Mayor Archival ang mga nanambong sa kalihukan nga magpasiugda sa paghimo og composting diha sa ilang tagsa-tagsa ka panimalay aron mosunod ang ilang kasilinganan.

Base sa pagtuon, 50 porsiyento sa mga basura ang biodegradable o malata samtang 30 porsiyento ang mga recyclable ug 20 porsiyento ang iglalabay na gyud ug dili na magamit.

Matod sa mayor nga kon magtinabangay lang gyud ang katawhan, dako kaayo og ma-save ang siyudad sa gasto sa paghipos sa mga basura.

Ang siyudad maoy nag-abaga sa tipping fee sa mga garbage truck nga naglabay og basura ngadto sa landfill sa Binaliw.

Kon 20 porsiyento na lang sa mga basura ang malabay ngadto sa landfill, dako kaayo ang madaginot sa Dakbayan sa Sugbo. / VLM