Ben Madilynn
Gibasura sa Court of Appeals (CA) ang petisyon sa kanhi Mandaue City Mayor Jonas Cortes nga nangayo og temporary restraining order (TRO) sa kamanduan sa Ombudsman pag-dismiss kaniya gikan sa serbisyo.
Ang dismissal order adunay silot nga perpetual disqualification sa paghupot ug posisyon sa gobyerno.
Sa desisyon sa Fifth Division sa CA gilatid niini nga way “extreme urgency and paramount necessity” aron ihatag ang TRO nga gihangyo ni Cortes.
Ang kamanduan sa Ombudsman may kalabutan sa reklamo nga nitugot si Cortes pagpa-operate sa SUPREA Philippines Development Corp., usa ka batching plant nga nahimutang sa Barangay Labogon nga wala ang gikinahanglan nga mga permit, sama sa business, sanitary ug environment clearance.
Ang reklamante nimikutlo nga ang operation sa maong batching cement plant naghatag kinig risgo sa panglawas sa mga molupyo duol sa maong lugar, apan si Cortes wala moluwat og cease-and-desist order.
“There is no clear showing that petitioner have sufficiently alleged a clear and unmistakable right, and that there is an extreme urgency and paramount necessity for a temporary restraining order and/or writ of preliminary injunction to be issued,” tipik sa resolution, nga giluwatan ni Justices Ramon Cruz, Tita Marilyn Payoyo-Villordon, ug Emily San Gaspar-Gito.
Si Cortes mi hangyo sa CA pag pugong sa buhatan sa Ombudsman pag patuman sa kamandoan pinitsahan niadtong Septiyembre 26, 2024.
Ang Ombudsman nakit-an siya nga sad-an sa kasong grave misconduct nga maoy hinungdan nga gi palagpot siya sa serbisyo ug gipahamtangan kinig silot nga mao ang “cancellation of eligibility, forfeiture of retirement benefits, ug perpetual disqualification for re-employment in the government service”.
“He has a duty to act, but he deliberately chose not to act,” tipik sa desisyon sa Ombudsman sa milabayng Septembre diin nahukman siya nga sad-an sa kasong grave misconduct. / AYB
