Ang tawag ni Willie Generalao

Una sa tanan, akong makabungog nga pahalipay ngadto ni Filipino world boxing champion Pedro Taduran kinsa malampuson nga nakadepensa sa iyang International Boxing Federation (IBF) minimumweight title pinaagi sa split decision sa ilang rematch ni Ginjiro Shigeoka kagahapon didto sa Osaka, Japan.

Pero ang mitabon sa split decision nga kadaugan ni Taduran mao nga ang 25-anyos nga si Shigeoka kinsa nakaangkon og grabing bun-og sa iyang lawas sulod sa 12 ka hugna, gisakay sa stretcher sa iyang pagbiya sa ring.

Sa una nilang away, mga napulo ka buwan ang nakalabay, sa gihapon, si Shigeoka nakaangkon usab og grabing kulata ug gipaundang kini sa referee sa ikasiyam nga round.

Apan mas grabi ang iyang sitwasyon karon sanglit si Shigeoka nakalingkod pa sa iyang corner sa wala pa kini ipahumatang sa stretcher sa mga medical staff sa dihang nabantayan nga daw og sa nilumoy ang kalawasan niini.

Masabot nga pinugos na ang iyang lahutay sa pagsugod sa ikawalo nga round diin pirmi na kining makadawat sa kastigo ni Taduran.

Ang duha ka mga judges mitali og 115-113, ug 118-110 pabor kang Taduran samtang ang ikatulo 115-113 pabor ni Shigeoka.

Sa kadaugan, si Taduran mipausbaw sa iyang record ngadto sa 18-4-1, 13KOs samtang si Shigeoka na-us-os ngadto sa 11-2, 9KOs.

Sa kadaugan ni Taduran, ang Pilipinas nagpabilin nga aduna gihapoy duha ka world champions sa kasamtangan.

Sa niaging buwan, malampuson usab nga nadepensaan ni Melvin Jerusalem ang iyang World Boxing Council (WBC) World Minimumweight Championship pinaagi sa pagpukan na usab ni Yudai Shigeoka pinaagi sa unanimous decision. Si Yudai igsuon ra usab ni Gingiro.

Congratulations, Team Taduran.

○ ○ ○

Kagahapon, surprisang nanawag kanako si Willie Generalao, ang kanhi rookie of the year awardee sa PBA niadtong tuig 1980.

Si Generalao, lumad nga taga siyudad sa Sugbo ug usa sa mga produkto sa University of the Visayas (UV) Green Lancers nga nakakulit og pangalan sa unang professional basketball league sa Asia. “Little General” maoy angga niya sa PBA.

Usa sa katuyoan ni Willie diri kanato mao nga nagpakisusi kini kalabot sa sitwasyon karon sa Cebu Classic Team sa nagpadayon nga Maharlika Pilipinas Basketball League (MPBL).

Ang buot niyang ipasabot kining kaguliyang ug kontrobersiya karon nga mihaklap sa team diin giingon nga daghan na sa mga players ang namiya.

Matod ni Generalao nga iyang nasayran nga taodtaod na diay nga walay suweldo ang mga players ug coaching staff sa team.

Kon kaniadto aduna silay 21 ka mga players karon 15 na lang kabuok , ug sagad sa mga reliables nila nanglayas na.

Nakabasa ta sa post sa beteranong sportswriter didto sa Kaulohan nga si Snow Badua sa social media kalabot niini.

“Dili ni kay sa pagpanghilabot sa team. Ang ako ba kay nagdala man gud ni sa ngan sa Cebu. Unya ako as Cebuano ug kanhi usab player, nibati sab ta og sempatiya nila. Ang Cebu Team gud kaniadto panahon namo, gikahadlokan man gyud na sa Manila. Karon lahi na man. Morag walay gana kay wala masuweldohi,” matod ni Generalao kinsa mao karon ang team consultant sa Pasay Voyagers sa MPBL.

Niadtong Domingo, ang Pa­say Voyagers yanong midabo-da­bo sa Cebu Classic, 107-80.

Sa kasamtangan, ang Cebu Classic adunay 4-7 nga baraha.

Sa dugang pakisusi, modagan na sa duha ka buwan nga nadelatar ang suholan sa mga players ug coaching staff sa Cebu Classic.

Sa niaging pipila na ka semana, gisaaran sila nga i-release na ang ilang suweldohan, pero hangtod karon wala pa silay nadawat. Apan taliwala ning tanan, nagpabilin ang ilang paglaom nga mahatagan ra kini og kasulbaran.

Dili ra hinuon problema kanila ang ilang matag adlaw nga kunsomo kay anaa ra man silay masima-sima sa ilang gipuy-an.

Pero mao sab lagi na, gawas nga nag-antos sila sa kamingaw sa ilang pamilya, wala pa gyud silay ikapadala nini.

Pero taliwala niining tanan, sila nagpabiling malaumon nga mahatagan ra gihapon kini og kasulbaran.

Si Generalao, sa iyang bahin, wa hinuon mosalikway nga aduna usay pipila ka mga teams sa MPBL ang nakasinati sa susama niini.

Ug ingon niya nga hinaot unta mahatagan kini og igong pagtagad sa mga kadagkuan sa MPBL.

Sa pagkakaron, tan-aw niya, nga kadto lang mga teams nga adunay saktong financial backings ang nakapabor og maayo ning legaha.

Dunay lig-ong punto nga gustong ipaabot si Generalao. Kon way aksiyon nga buhaton ang mga kadagkuan sa MPBL kalabot niini, posibling “the league will die in a natural death;” sama sa Metropolitan Basketball Association.

Alang nako, mas maayo i-reduce ang number sa participating teams sa lega. Hashasan og maayo kon kinsa gyud kadtong maka-afford og dugaydugay nga katuigan ubos sa pinarmahan nga kontrata.

Kinahanglan aduna salary cap sa mga players, aron makita ang balance competition sa mga participating teams.

Unya ngadto sa ngadto, ipasunod dayon ang drafting sa mga players.

Niini, I’m sure nga maprotektahan sab ang interest sa lega ug ang interest sa mga team-owners.