Ben Madilynn
Samtang nangligid ang mga adlaw adunay mga nanggawas nga kalambuan sa nagpadayon nga imbestigasyon sa Philippine Offshore Gaming Operators (Pogo) ilabi na niadtong mga tawo nga giingong nalambigit niini.
Nagkaduol na sab ang proximity sa maong kontrobersiya human niadtong pagkapuhag sa Pogo hub sa Dakbayan sa Lapu-Lapu nga gironda niadtong hinapos nga bahin sa Agusto ug kapin sa 160 ka mga langyaw ang na-rescue ug nadakpan.
Sa labing uwahi nga kalambuan sa dihang gidapit si kanhi Cebu City Mayor Tomas Osmeña sa Ubos Balay Balaoranan sa quad committee investigation aduna kiniy gipangbulgar nga mga inpormasyon nga naglambigit sa gihulagway nga “very influential” nga personalidad.
Way pagduha-duha nga giyagyag ni Osmeña ang kanhi presidential assistant for Visayas Michael Lloyd Dino nga gipasanginlan’g suod og Pogo personalities. Usa sa giyagyag sa kanhi mayor diin nga matod pa multi high-rise buildings nga gitukod sa Cebu City niadtong mga higayona ubos sa administrasyon ni kanhi presidente Rodrigo Duterte.
Nagkalawom ang mga detalye ug inpormasyon mahitungod sa Pogo. Sa maong rebelasyon, aduna sab kahay nagpahipi nga Pogo hub sa dakbayan sa Sugbo? Mao kiniy atong tutokan o atngan kay basin sa mga umaabot nga adlaw makurat nalang ang publiko sa mangbutho nga inpormasyon o manggawas nga balita nga adunay laing Pogo hub ang gironda. Magpaabot sab ta sa tubag ni Dino sa seryuso nga alegasyon gikan sa kanhi mayor. Abangan ang susunod na kabanata, kon sa Tinagalog pa.
NAKABAWOS?
Laing gibutyag ni Osmeña ang matod pa nagdawatan og P1 milyones nga senimana nga payola gikan sa mga ilegal nga kalihokan ang kanhi hepe sa Cebu City Police Office (CCPO) retired Colonel Royina Garma.
Usa sa rason ngano’ng wa makauyon si Osmeña nga si Garma ang mangulo sa CCPO ug didto nag-ugat og ngano’ng dili maayo og relasyon si Osmeña ngadto ni Garma sa dihang naserbisyo pa kini sa PNP.
Dako ang pagduda ni Osmeña nga si Garma maoy hinungdan og ngano’ng bug-at og dugo si kanhi Presidente Duterte kaniya. Atngan sab nato ang pamahayag ni Garma labot niini.
