Anak mihulga nga mopatay sa iyang amahan gipapriso

Gidakop ang usa ka anak nga lalaki human niya gihulga nga patyon ang iyang amahan tungod kay wala hatagi og kuwarta alas 10:30 sa buntag niadtong Lunes, Hunyo 2, 2025, sa Sitio Camansi, Barangay Mambaling, Dakbayan sa Sugbo.

Ang suspek giila nga si alyas Mak-mak , 34 anyos, kanhi usa ka dance instructor, kasamtangan siyang gitanggong sa Mambaling Police Station samtang giandam ang kasong Grave Threat batok kaniya.

Ang iyang amahan nga si alyas Jimbo, 57 anyos, usa ka negosyante, maoy nagpadakop sa anak.

Nakuha si Mak-Mak sa mga barangay tanod human nakapangayo og tabang ang iyang amahan ug dayon gi-turnover ngadto sa kapulisan.

Gibutyag sa amahan ngadto sa kapulisan nga nasuko ang iyang anak kay wala hatagi og kuwarta nga ipalit unta og pagkaon.

Pangatarungan sa amahan, wala niya hatagi og kuwarta si Mak-Mak tungod kay nagtuo siya nga dili kini mopalit og pagkaon ug adto ra gihapon sa bisyo.

Tungod niini, nasuko si Mak-Mak ug gihulga ang iyang amahan nga patyon kon mogawas kini sa kwarto.

Nabalaka ang amahan sa iyang seguridad tungod kay nagumon na ang iyang anak sa bisyo.

Dili lang kini ang unang higayon nga nag-wild si Mak-Mak ug nanghulga nga patyon siya.

Nakapangayo og tabang ang amahan sa kabanay ug niabot ang mga tanod nga maoy nagpusas sa suspek nga niangkon sa krimen.

Giingon nga kanunay nga manghulga si Mak-Mak sa iyang pamilya, ilabi na konmakagamit sa iyang bisyo. / GPL