Anak giluba sa amahan, kritikal

Anaa sa talandugon nga kahimtang ang 36 anyos nga lalaki human gidunggab sa makadaghang higayon sa iya ra sab nga amahan nga giingong iyang gibunalan og kahoy nga binugha alas 3 sa hapon sa Huwebes, Mayo 22, 2025 didto sa Sityo Tukdaw, Barangay Bongoyan, Lungsod sa Borbon.

Ang biktima gitago sa pangalan nga Jojo kinsa nakaangkon og daghang samad dinunggaban.

Samtang napusasan ang iyang amahan nga gitago sa alya nga Diony, 63, kinsa mag-atubang og kaso’ng frustrated parricide.

Si Police Captain Gerry Antopina, hepe sa Borbon Police Station, mibutyag nga hubog ang amahan ug ang anak kay nagtagay uban sa ilang mga kabanay ug higala.

Ang biktima gibadlong sa iyang amahan kay matud pa nagmaoy.

Pero nasuko ang anak nga misangko sa ilang panaglalis.

Tungod sa kapungot sa anak, mikuha kini og binughang kahoy og gibunal-bunalan ang iyang amahan.

Nikamang paingon sa kusina ang naulahi og nikuha’g kutsilyo og dayo’ng dunggab sa iyang anak sa makadaghan’g higayon.

Napusasan ang amahan sa mga niresponde’ng kapu-li-san.

Ang amahan mibutyag nga naningkamot siyag panagang sa iyang kaugalingon.

Dili siya makatugot nga mapatay sa iyang anak.

Alang kaniya, mas maayo nga siya maoy mopatay sa iyang anak. / GPL