Mario Bautista
Maysa ti nadangran iti napasamak nga aksidente iti provincial road ti Barangay Bagani Gabor, Candon City, Ilocos Sur a nakairamanan ti Toyota Fortuner ken motorsiklo.
Ti Toyota Fortuner ket minaneho ni Raymund Haban Quitilen, agtawen iti tallopulo ket walo, taga-Barangay Calaoa-an, Candon City.
Ti met Suzuki Raider 150 Fi motorcycle ket minaneho ni Ramil Cudiamat Pariñas, agtawen iti duapulo ket maysa, taga-Barangay Allangigan 2nd, Candon City.
Agpapadaya ti Fortuner ket idi nadanonna ti nakapasamakan ti insidente, nagsardeng iti akin-kannawan a paset sakbay a nag U-turn idin ta ti napaspas patarayna a motorsiklo nga aggapu iti likudanna ket nasagidna ti left side ti Fortuner kangrunaan iti left back passenger seat.
Gapu dayta, nagsagaba ti drayber ti motorsiklo iti left eye injury, left knee injury ken abrasion iti nadumaduma a paset ti bagina a naipaagas iti ospital para iti pannakatamingna idinto a saan met a naan-ano ti drayber ti Toyota Fortuner.
Nakainom ti drayber ti motorsiklo idi mapasamak ti insidente.
