Ben Madilynn
Patay ang usa ka abogada human gituohan nga milayat gikan sa rooftop o 16th floor sa FLB Corporate Center Building, Bohol St., Cebu Business Park, Barangay Luz, dakbayan sa Sugbo, pasado alas 2 sa hapon, Biyernes, Septiyembre 20, 2024.
Ang abogada, 33, residente sa Barangay Pajo, dakbayan sa Lapu-Lapu.
Sumala sa Mabolo Police Station, pamilya sa abogada maoy nihangyo nga dili lang una ibutyag sa publiko sa namatay ug sila ang mohimo og opisyal nga pamahayag bahin sa hitabo.
Sigon sa pamahayag sa mga higala sa abogada nga nahinabi sa mga imbestigador sa Mabolo Police Station nga miambak kini gikan sa ika-16 nga andana sa naasoy nga edipisyo apan wala pa matino kung unsay hinungdan sa iyang pag-ambak.
Matod ni Police Major Romeo Caacoy, ang hepe sa Mabolo Police Station, nga ila pa nga susihon kung unsa ang rason nganong gihimo sa biktima ang pagkutlo sa iyang kinabuhi o wala ba kini foul play.
Atol ning pagsuwat, si Caacoy wala pay igong detalye samtang nagpadayon pa ang ilang ibestigasyon.
“Subayon sa atong imbestigasyon, kinahanglan nga ato pang susihon kung unsa gyud ang mga rason kung nganong nahitabo to siya. Dili sa ta mo-conclude nga nilayat o nahulog so padayon pa ang atung imbestigasyon,” matod ni Caacoy.
Nibisita na sa Mabolo Police Station ang miyembro sa pamilya sa abogda apan wala pa usab mohatag og igong kasayoran samtang nagbangotan oa apan nisaad nga sabotan pa sa pamilya ang paghatag og pamahayag. / AYB
