Ben Madilynn
Usa ka suspek nga tigpayuhot og gidiling drugas nasakpan ug nasikop dihang nayagyag sa dan ang drugas human naaksidente sa iyang motorsiklo sa national highway sa Barangay Tinaan, Dakbayan sa Naga, alas 11:44 sa buntag, Miyerkules, Septiyembre 18, 2024.
Ang nasikop mao si Joe (dili tinuod ngan), hamtong ang panuigon, ug taga Sityo Laguna, Brgy. Bulacao, Siyudad sa Sugbo. Gipugnan ning mantaan ang tinuod nga ngan sa suspek samtang wa pa makuha ang iyang habig ug pagtamod sa polisiya sa kapulisan.
Sa dugang pakisusi sa Superbalia Cebu, nasayran sa imbetigasyon sa kapulisan sa Naga ubos sa kamandoan sa ilang hepe nga si P/Lt. Col, William Homoc nga nitubag sila og alarma sa aksidente.
Ang motorsiklo sa suspek nga nagpdulong sa Dakbayan sa Sugbo nasangit sa tubo nga dala sa usa ka lalaki nga nagbiseklita, kinsa angol usab sa insidente.
Ang suspek nalamba sa dan hinungdan nga samdan kini.
Sa pag-abot sa kapulisan sa dapit, nakita nila ang pakete sa drugas nga nakatag sa dan lakip sa drug paraphernalia.
Sumala sa kapulisan, duha ka mga pakete ang dunay sud nga gituohang shabu, dunay 54 ka rectangular plastic apan wala way sud ug usa ka improvised.
Ang suspek gidakop apan gidala sa kapulisan sa City of Naga Infirmary aron matambalan sa samad ug bun-og nga naangkon.
Atol ning pagsuwat, ang kapulisan sa Naga wala pa mohatag og banabana sa kantidad sa gidiling drugas nga nasakmit samtang nagpadayon pa sa ilang imbestigasyon bahin sa background sa suspek.
Matod pa nga palawman sa kapulisan ang ilang imbestigasyon bahin sa pagpayuhot sa gidiling drugas labina sa tinubdan ug mga parokyano niini.
Dugang sa kpaulisan, ang supek mag-atubang pa og kasong kalapasan sa Sec.11 ug 12 Artcle II RA 9165 o Comprehensive Dangerous Drugs Act of 2002./ DVG
