Mario Bautista
Ikonkonsiderar itan ti Korte Suprema ti pannakausar ti Artificial Intelligence para iti panagdesisyon ken panangmonitor kadagiti civil ken criminal case.
Kabayatan ti pannakadengngeg ti naisingasing a 2025 budget ti Judiciary, kinuna ni Supreme Court Administrator Raul Villanueva a malaksid iti legal research, mabalin nga usaren ti AI a mangurnong iti record para iti drafting decisions.
Mabalin met nga usaren ti AI a mangmonitor kadagiti hues ken mahistrado maipapan iti kasasaad dagiti kaso, nangnangruna dagidiay nakasagana iti korte.
Iti agdama, mangdev-develop ti Korte Suprema iti voice to text transcription tapno bayat nga agsasao ti witness, mairekord ken mai-transcribe.
Maad-adal pay ti pannakausar ti AI a mabalin a mangi-translate iti English dagiti testimonya a Tagalog wenno dadduma pay a dialekto.
Iti sabali a bangir, inyebkas ni Senate Finance Committee Chairperson Grace Poe ti suportana iti daytoy bayat nga ipalagipna a saan a dumepende iti AI tapno saan a mapukaw iti human side dagiti desisyon iti korte.
