Ben Madilynn
High value individual nga usa ka plea bargainer ang nadakpan pagbalik human gironda sa Labangon Police Station ubos sa pagdumala ni Police Major Eraño Regidor ang balay niya sa Sityo Kadasig Phase 3, Barangay Tisa, sa ala 1:10 sa hapon, Lunes, Septiyembre 16, 2024.
Pinasikad sa search warrant nga giluwatan ni Judge Marlon Jay Moneva, presiding judge sa RTC 7, Branch 74, Dakbayan sa Sugbo gisiksik ang balay sa subject nga giila sa alyas nga Rey, 44.
Nakuha sa mga polis ang mga pinutos sa gituohang shabu nga motimbang ang tanan sa 50.65 gramos nga adunay standard drug price nga P344,420.
Matod ni Regidor nga migawas ang pangalan sa suspek sa ilang mga nanglabay nga dakop nga siya ang usa sa tinubdan sa ilegal nga drugas sa ilang lugar.
Tungod niini ilang gipaubos sa intelligence monitoring ug nakompirmar ang maong inpormasyon.
Mi-apply gilayon ang Labangon Police Station og search warrant sa korte aron masiksik ang balay ni Rey diin gitago ang ilegal nga drugas.
Gibutyag ni Regidor nga nadakpan na niadtong milabay’ng tuig si Rey sa kalapasan sa Section 5 ug 11, Section II, RA 9165, ug bag-uhay lang nakagawas human mi-avail sa plea bargain.
Inay nga magbag-o sa kinabuhi mibalik na usab sa iyang naandan nga trabaho nga mao ang pagpamaligya sa ilegal nga drugas.
Gisusi pa sa Labangon police kon si kinsa ang iyang tig-supply sa ilegal nga drugas. / AYB
