Ben Madilynn
MIKABAT sa P93,843 ang natangag sa mga kawatan human giransak ang usa ka branch sa Mr. DIY sa Quiros Street, Poblacion Dos, Bansalan, Davao del Sur, Septyembre 16, 2024.
Sigon sa taho sa Bansalan Municipal Police Station, usa ka personahe sa maong tindahan ang mi-report kanila bahin sa pagpangransak. Matud pa, pasado alas 7:30 sa buntag, nakugang na lamang ang mga nanarbaho sa tindahan kay nagpasad na ang mga gamit ug abri na ang storage room sa maong establisemento.
Ang wala ginganli nga personahe sa tindahan nagbutyag nga dihang iyang gisusi, nakita nga pugsanong giabrihan ang ang duha ka safety vaults sa tindahan. Gituohan nga gigamitan kini og martilyo, crow wrecking bar ug box wrench hinungdan nga malampuson nga nabuksan.
Sa pikas bahin, giputol sab sa mga mamumuno ang internet connection sa lugar.
Unod, matud pa, sa unang safety vault ang kantidad sa P13,002, samtang ang laing usa, gitaho nga duna’y unod nga kapin kon kulang P80,841 kun P93,843 sa kinatibuk-an.
Gituohang misulod ang kawatan sa sa exit sa ikaduhang andana sa fire exit sa establisemento. Giguba usab niini ang alarm sensor sa tindahan ug gibangagan ang bungbong nga gama sa plywood aron maabrihan ang pultahan sa sulod.
Dali nga gi-kordon sa kapulisan ang crime scene alang sa pagpangita sa mga marka nga moila sa mga milungkab sa lugar. Wala usa’y nakuha nga CCTV footage ang kapulisan tungod kay wa’y suplay sa kuryente ang tindahan ug gagamit lamang kini og generator, gawas nga gikataho usab nga wa’y guwardiya nga nagbantay dinhi kung gabii.
Padayon pa ang Bansalan Municipal Police Station sa imbestigasyon sa hitabo aron nga gukdon ang mga suspek sa ransak. (July Aubrey R. Ngo)
