Ben Madilynn
Wa makagawas ang 80 anyos nga lola sa balay sa dihang miulbo ang kayo niadtong alas 2 sa hapon, Lunes, Septiyembre 16, 2024 sa Sityo Balanghoy, Barangay Gun-ob, Lapu-Lapu City.
Ang biktima nailhan sa alyas Ely ug sigon pa sa nakaila sa ilang dapit nga nag-antos siya sa Alzheimer’s disease.
Base sa inisyal nga imbestigasyon sa kabomberohan nga nag-inusara niadtong higayona si Ely sa ilang balay sa dihang ang iyang anak babaye milakaw paingon sa tindahan, aron sa pagpalit og sud-an.
Naglisod ang mga silingan sa pagluwas sa biktima gumikan sa kadako sa kayo ug gitabang sa mga kabomberohan nga dili makakatap ang kayo sa ubang silingang estraktura.
Matod pa ni F03 Jopet Obiña, sa Bureau of Fire and Protection (BFP) nga moabot ngadto sa P720,000 ang danyos sa maong sunog.
Atol niining pagsuwat gisusi pa sa kabomberohan ang hinungdan sa maong pag-ulbo sa kayo. / DVG
