Ben Madilynn
Patay ang barangay tanod human ang iyang gimaneho nga motorsiklo gibanggaan sa laing motorsiklo, alas 4:15 sa hapon, Dominggo, Septiyembre 15, 2024, sa Purok Pazigtil, Brgy. Poblacion, lungsod sa Samboan.
Si Crispin Fuentes, 53, minyo, tanod sa Barangay Bonbon, Samboan gideklarar sa mga doktor nga dead-on-arrival (DOA) sa Malabuyoc District Hospital.
Samtang kritikal si Altair Rodriguez, 51, minyo, ug taga Barangay Bonbon, Samboan, kinsa naa pa na-admit sa Malabuyoc District Hospital.
Si Police Staff Sgt. Ressel Jabagat sa Samboan Police Station nga nahinabi sa Sunstar Superbalita Cebu nagkanayon nga nakainom si Rodriguez gikan sa 40 diyas sa iyang amahan.
Padulong kini nga mopauli ug kusog nga nakapadagan sa iyang motorsiklo, ni-overtake kini sa duha ka sakyanan ug akto sab nga gikasugat niya ang motorsiklo sa tanod padulong sa Poblacion nga magkuha sa iyang asawa.
Ang duha pulos nalandig sa tambalanan apan ang tanod gideklarar nga dead on arrival. Samtang si Rodriguez kritikal atol ning pagkuha sa kasayoran./GPL
