Ben Madilynn
Naluwas sa mga rescuer ang usa ka 12 anyos nga batang lalaki nga naanod sa suba sa Sapangdaku, Barangay Dunlog, Dakbayan sa Toledo, alas 12:30 sa hapon, Lunes, Septiyembre 16, 2024.
Ang bata taga Purok 1, Mahayahay, Daanlungsod, Toledo nga naligo sa suba uban sa laing bata apan nadakin-as kini sa mini dam hinungdan nga nadala sa sulog sa tubig.
Ang mga kaubang bata daling nakapangayo og panabang sa mga molupyo sa dapit.
Ang mga bombero sa Toledo ubos sa pagpangulo ni fire Chief Inspector Paul Patrick Laude mao ang nitubag sa alarma.
Ang bata ilang giatngan sa ubos nga bahin gikan sa gikaligoan ug ilang giitsahan og pisi aron mabira kini sa daplin.
Matod pa, usa ka grupo sa mga bata nangaligo sa suba human gisuspenso ang klase sa dakbayan tungod sa dili maayong panahon.
Matag karon ug unya magbunok ang uwan dala sa kusog nga hangin nga habagat nga gipakusog sa bagyong ‘Gener’ nga niigo sa pipila ka rehiyon sa Luzon.
Ang awtoridad nipasidaan sa publiko, labi na sa mga bata nga dili mokompiyansa sa pagkaligo sa sapa o suba ning panahona tungod sa baha nunot sa dili maayong panahon. / DVG
