Ben Madilynn
DAVAO DE ORO – Dead on arrival sa balay tambalanan ang 28-anyos nga lalaki human gipusil sa wala mailhing mga armado sa Purok 4, Brgy. Poblacion, Compostela alas 8:30 sa gabii, Septyembre 13, 2024.
Ang biktima giila nga si Ram Christopher Rodriguez.
Base sa inisyal nga imbestigasyon, nasayran nga ang biktima naglingkod sa balkonahe sa ilang balay samtang nakigtagay og inom uban sa iyang mga higala.
Matud pa nga taliwa sa tagay, nadungog sa biktima nga dunay nisampit sa iyang pangalan gikan sa gawas hinungdan nga iya kining gisusi apan maoy misugat ang mga bala gikan sa armas sa wa mailhing mga suspek.
Sumala pa nga gipusil ang biktima sa makadaghang higayon sa duha ka wala mailhing mga armado kinsa yano lang sab nga nagbaktas human mahimo ang krimen palayo, paingon sa Brgy. Mapaca, utlanan sa lungsod sa Monkayo.
Samtang ang biktima gidali pagdala sa Davao De Oro Provincial Hospital aron siya matambalan apan gideklarang dead on arrival sa doktor nga mihiling kaniya.
Usa ka hot pursuit operation ang gilusad sa kapulisan sa Compostela Municipal Police Station sa tinguha nga mailhan ug madakpan ang mga mipatay sa biktima. (Dexter T. Visitacion)
