Ben Madilynn
Giila sa kaulisan nga usa ka high value individual (HVI) nasikop sa buy-bust sa Barangay Canamucan, lungsod sa Compostela, amihanan sa Sugbo, alas 12:25 sa kaadlawon, Sabado, Septiyembre 14, 2024.
Ang nasikop giila sa alyas “Franz”, 45, minyo, taga Purok 2, Brgy. Sabang, dakbayan sa Danao, kinsa nakuhaan og gituoang shabu nga motimbang og 3,150 gramos nga dunay estimated standard drug price nga moabot ngadto sa P21,000,420.
Ubang nakuha nga ebidensiya gikan sa suspek mao ang usa ka pakite sa shabu nga gipalit sa poseur buyer gamit ang P74,000 nga bugos money nga gipaibabwan og P1000 nga original money.
Nakuha usab sa iyang posisyon ang duha ka vacuum heat-sealed transparent plastic packs ug dugang mga putos sa gidudahang shabu.
Ang malampuson nga operasyon usa ka hiniusang pwersa sa Provincial Drug Enfocement Unit. Cebu Police Provincial Office (CPPO) isip lead unit sa pagpangulo ni P/Lt. Jefferson C. Dalman ubos sa kamandoan ni P/Lt. Col Antonio G. Ananayo Jr., kapulisan sa Compostela ubos sa kamandoan ni P/Col. Percival R. Zorilla uban sa koordinasyon sa Philippine Drug Enforcement Agencty (PDEA) 7.
Ang suspek gibalhog na sa bilanggoan sa Compostela ug gikatakda nga pasakaan og tukmang kaso karong adlawa, Septiyembre 16, 2024. / DVG
