Kasong Qualified Trafficking in Person, naipila ti DOJ kontra ken ni Alice Guo inton sumaruno a lawas
abyasa
LAOAG CITY – Sumangsango ni Dismissed Bamban, Tarlac Mayor Alice Guo iti sabali pay a kaso kriminal.
Daytoy ket kalpasan nga inbilin ti Department of Justice panel of prosecutors ti pannakaipila ti kaso a Qualified Trafficking in Person kontra iti dati a mayor.
Immuna iti daytoy, nangipila ti Presidential Anti Organized Crime Commission ken Philippine National Police – Criminal Investigation and Detection Group iti nadakamat a reklamo iti Department of Justice idi napan a Hunio.
No sadinno, adda ti pakainaiganna iti mapapati nga illegal operation ti Philippine Offshore Gaming Operations hub iti ili ti Bamban.
Segun iti Justice panel of prosecutors, kalpasan ti umuna nga imbestigasionda iti naipila a reklamo, nakasarakda iti prima facie nga ebidensia.
Kayatna a sawen, adda umdas a pangibatayan tapno maipila ti reklamo iti korte.
Naituding nga ipila ti Department of Justice ti kaso iti Tarlac RTC inton sumaruno a lawas.
Kabayatanna, apaman a maipila ti kaso idiay Tarlac, kiddawen ti Department of Justice a maiyakar ti hearing-na iti Manila RTC.
