Drayber sa traysikol naigo sa saag nga bala

Namasahero ang traysikol drayber sa Upper Candabong Jampan, Lungsod sa Argao apan kalit lang nga namanhod ang iyang paa ug nagkadugo, alas 9:00 sa buntag sa Sabado, Septiyembre 14, 2024.

Ang biktima nga gitago sa pangalan nga ‘Audy’, 56, minyo nga taga Barangay Poblacion, Argao.

Naghatod siya og pasahero sa Upper Candabong Jampan ug aduna siyay nadunggan nga lima ka buto sa armas, ug mao nalay iyang namatikdan nga naminhod ang iyang wala nga bahin sa sampot ug ang bala giingong milapos ngadto sa paa.

Nakahigayon pa og maneho pauli sa ilang balay ang biktima og nangayo og tabang sa iyang kabanay nga madala sa tambalanan.

Ang Argao Municipal Police Station nga gidumala ni Police Major Janus Giangan ang misubay sa hitabo aron pagsuta kon kinsay naghimo sa indiscriminate firing niadtong tungora. / DVG