Ben Madilynn
Ang point guard nga si Chris Paul tumong nga makuha na ang kinaham nga milestone ug mahimong ikatulong player nga nakarekord og 12,000 assists sa National Basketball Association (NBA).
Kuwang nalang og 106 ka assists si Paul para makasulod sa elite nga 12,000 assists club. Sa kasaysayan sa liga duha palang ang nakabuhat niini nga sila John Stockton (15,806) ug Jason Kidd (12,091).
Posible na kining mahitabo kang Paul sa pagarangkada sa 2024-2025 NBA season sa sunod buwan.
Sa pagkakaron ang 39-anyos dunay 11,894 ka assists sa iyang mabulokon nga NBA career nga nagsugod sa New Orleans Hornets tuig 2005.
Sa miaging season ubos sa Golden State Warriors si Paul nag-average og 9.2 puntos, 3.9 rebounds, 6.8 assists ug 1.2 steals.
Kon mag-average gihapon og susama nga assists si Paul sa miaging season, makuha niya ang milestone sulod lang sa 16 ka duwa.
Si Paul moduwa na ubos sa San Antonio Spurs human kini ma-trade. / RSC
