Ben Madilynn
Patay ang usa ka wanted sa kasong murder human nisukol sa kapulisan nga nagsilbi sa warrant of arrest ug nahitabo ang hamubong engkwentro sa Barangay Jampan, bukirang dapit sa lungsod sa Argao, habagatan sa Sugbo, alas 5:45 sa buntag, Biyernes, Septiyembre 13, 2024.
Si Joeraldine Bajenting Gevana alyas Jiraldin, hamtong ang pangidaron, ug molupyo sa dapit, gidala sa Isidro C. Kintanar Memorial Hospital (ICKMH) sa Barangay Bogo, Argao apan gideklarar sa attending physician nga dead on arrival.
Usa ka patrolman nga sakop sa team sa kapulisan sa Argao nga nihimo sa operasyon samdan ug gidala usab sa samang ospital.
Nasayran sa Superbalita Cebu sa imbestigasyon sa kapulisan nga gipangulohan sa ilang hepe nga si P/Maj. Janus Giangan ang nagsakay sa ilang service vehicle padulong sa Jampang aron pag-serve sa warrant of arrest batok kang Gevana nga giisyo ni Judge May Faith Lledo Trumata-Rebotiaco sa korte sa Argao.
Apan pag-abot sa maong dapit, gipamusil ang mga arresting officer sa wanted kuÂyog sa ka kauban niini ug usa kanila ang natapsingan sa bala sa iyang walang nawong ug natumba.
Samtang ang service vehicle sa kapulisan sa passenger’s side nabuslot tungod sa bala sa armas ug ang windshield usab nabuak.
Matod pa, ang maong wanted nidagan padulong sa tunnel ug gisigihan kini sa papusil sa kapulisan sa pagdepensa usab sa ilang kaugalingon.
Dihang nikalma na ang sinukliay sa mga bala, gisusi sa kapulisan ang usa ka tunnel ug nakita ang suspek nga nagkadugo uban sa posisyon niini nga kalibre .45 nga pistola.
Ang tunnel o buho sa yuta dunay igong gilawmon ug sa tumoy niini sa ilawom adunay higdaanan ug lamisa nga kan-anan.
Nagtuo ang kapulisan nga usa kini ka tagoanan sa maong wanted uban sa iyang mga kauban.
Atol ning pagsuwat, wala masayran ang kauban sa wanted nga nakasibat atol sa engkuwentro. / DVG
