Ben Madilynn
Gipusil-patay ang usa ka lalaki sa wala pa matino nga mamumuno sa grahian sa mga modern jeep sa Sitio Feathers, Barangay Day-as, Dakbayan sa Sugbo, pasado alas 3:00 sa kaadlawon, Biyernes, Septiyembre 13, 2024.
Ang biktima giila nga si George Mendoza, 48, taga Batangay Talamban apan kasamtangan nga nagpuyo sa maong lugar uban sa iyang kaipon.
Nakaangkon og samad pinusilan sa suwang ug milapos sa iyang ubol-ubol sa liog nga maoy hinungdan sa iyang hinanali nga kamatayon.
Matod sa kapuyo sa biktima nga si Marilyn Andrino nga nakadungog na lang siya og usa ka buto sa armas sa dapit ug pipila ka gutlo gipahibawo siya nga ang iyang kapuyo ang gipusil patay.
Iyang gibutyag sa interview sa DyHP RMN Cebu nga gisaka sila og upat ka mga tawo sa ilang balay ug gitawag nila si George nga panaugon sa ilang balay.
Dugang ni Marilyn nga ang duha sa mga lalaki pulos naka-helmet samtang ang duha naka-facemask ug mipugos sa pagpakanaog sa iyang kapuyo.
Paglakaw sa biktima uban sa maong mga lalaki, nakadungog dayon siya og buto sa armas gikan sa bakante’ng luna nga gihimo’ng parking area sa modern jeep.
“Gisulod mi sa upat ka tawo sa balay namo, natulog pami ato pero gipugos gyud si George nga pakanaogon mao to pag kanaog nakabati na lang ko’g usa ka buto sa armas,” matod ni Andrino.
Giangkon hinuon ni Marilyn nga mogamit panagsa og ilegal nga drugas ang biktima kung dunay mohaylo niini.
Gisubay pa karon sa kapulisan kung kinsa ang responsabli sa pagpamusil ug gipangsusi ang mga CCTV sa dapit aron makatabang sa ilang imbestigasyon. / AYB
