Ben Madilynn
Patay ang usa ka technician nga nakuryentihan sa Sitio Rocky Hills, Barangay Puente, lungsod sa Carmen, alas 7:00 sa buntag, Huwebes, Sept. 12, 2024.
Ang biktima mao si Charles Jared Rule, 26, minyo, usa ka technician sa One Love Wifi, ug taga Barangay Bactas, lungsod sa Catmon.
Sa follow up sa Superbalita Cebu pinaagi sa pasiunang imbestigasyon sa kapulisan sa Carmen ubos sa kamanduan sa ilang hepe nga si P/Capt. Jessie M Tañola, nasayran nga ang biktima ang nag-inusara sa pag-ayo sa reklamo sa usa ka subscriber nga way internet connection kay ang kable naputol human nasangit sa pag-agi sa usa ka dump truck nga nanghakot og anapog sa maong dapit.
Matod pa, ang biktima sa dihang nisaka para sumpayon na unta ang kable, iyang gibantingan og bato ang kable ug kini giitsa ngadto sa sanga sa kahoy aron motaas ang kable ug di na masangit sa sakyanan.
Apan sa iyang paglabay, didto kini masablay sa main line sa kuryente sa Cebeco 2 mao nga nakuryentihan ang biktima ug nahagbong. Ang iyang ulo nabunal sa gahi nga bahin sa maong karsada hinungdan nga nakaangkon og dako’ng samad sa ulo.
Si Rule gitabang sa mga rescuers sa Carmen uban sa ilang rural health doctor nga si Rica Niña E. Salas ug gidala sa tambalanan, apan pagka alas 9:30 sa buntag sa samang adlaw, nakabsan kini sa knabuhi. / DVG, GPL
