Mario Bautista
Nakemmeg ti maysa a lalaki gapu iti panangdangranna iti babai a nagpailotanna idiay Barangay Pudoc East, Tagudin, Ilocos Sur.
Nabigbig ti suspek a ni Ryan Ormita Natividad, agtawen iti tallopulo idinto a ti biktima ket ni Jerelma Lanuza Maala, agtawen iti tallopulo ket dua, agpada nga agnaed iti nasao a lugar.
Segun iti biktima, bayat ti panaglutona iti pangrabii idi Agosto 30, nagkiddaw nga agpailot ti suspek.
Binagaan met ti biktima ti suspek nga ilotenna laengen iti papag iti ruar ti pagtaenganda ngem saan a kinayat ti suspek ta amangan no makita ti asawa ken katuganganna ket adda ti saanda a pagkinnaawatan inaig iti daga.
Nupay kasta, immanamong ti biktima iti kayat ti suspek nga iluten iti uneg ti pagtaenganda ngem bayat ti panagilot ti biktima, sabali ti nagbalin a tignay ti suspek isu a nagsardeng ti biktima a mangil-ilot kenkuana.
Ngem gapu dayta, dinanog ti suspek ti biktima iti namin-ano a daras.
Naipaagas iti ospital ti biktma ken maidalanto iti CT scan iti sumaruno nga aldaw.
Basar iti medical certificate, natukkol ti nasal brigde area ti biktima ken nadunor ti nadumaduma a paset ti rupana ken tengngedna.
