Traffic enforcer sa Naga gisumbag sa PUJ drayber

Gisumbag og PUJ drayber ang traffic enforcer sa Naga City nga nagpatunhay sa dagan sa trapiko niadtong alas 9 sa gabii, Miyerkules, Septiyembre 11 sa highway sa Barangay Central Poblacion.

Ang biktima giila sa kapulisan nga si Elmer, 30, taga-Seaside Uno, Barangay Poblacion, Naga samtang ang suspek giila nga si Junjun, 33, taga-Purok Acasia, Barangay Lutac, Naga.

Sa nahipos nga kasayuran sa Naga, ubos sa kamanduan ni Police Lieutenant Colonel William Homoc, nga samtang nagdumala sa dagan sa trapiko si Elmer nakita niini ang de pasaheroan nga multicab nga gimaneho ni Junjun nga nagkarga og pasahero.

Gisita ni Elmer ang PUJ drayber tungod kay dili designated nga loading o unloading area, hinungdan nga nakabalda kini sa trapiko niadtong higayona.

Giduol sa enforcer ang maong drayber aron sa pagbadlong apan mitumaw ang panaglalis sa duruha ug mikanaog sa iyang unit ang suspek dayong sumbag sa biktima.

Nadakpan ang maong suspek sa responding police team ug napriso.

Pangatarungan sa suspek nga giunhan siya og tukmod sa maong enforcer hinungdan nga na siya mibawos.

Reklamong direct assault ug physical injury ang atubangon sa maong PUJ drayber. / DVG