Ben Madilynn
Nalumos-patay ang crew sa pumpboat nga gisakyan og mga turista nga nag-island hopping sa mga isla sa Panglao, Bohol.
Gikonpirmar sa hepe sa Provincial Disaster Risk Reduction Management Office, Lalawigan sa Bohol, Dr. Anthony Damalerio nga adunay tulo ka mga pumpboat nga gisakyan og mga turista nga nag-island hopping ang naatlan sa dagkong bawod sa alas 11:30 sa buntag, Huwebes, Septiyembre 12. Gumikan sa pagkusokuso ug hampak sa bawod, nahulog ang boatman nga si Vito Vistal, 62, taga Inabanga, Bohol.
Patay na nga nakuha sa mga sakop sa Philippine Coast Guard, Bohol si Vistal, samtang 20 ka tawo ang ilang naluwas kinsa nakaangkon og minor injuries.
Base sa nahipos nga kasayuran nga ang mga biktima naglawig gikan sa Balicasag Island nga nahimutang sa habagatang kasadpan sa isla sa Panglao.
Sa pagpauli na sa grupo sa duol sa Gak-ang Islet sakop sa Panglao, gisugat og dagkong bawod ang tulo ka pumpboat nga naglawig niadtong higayona.
Matod pa ni Damalerio nga ang mga naluwas nga pasahero ug crew gidala sa Tagbilaran City Hospital. / DVG
