Ben Madilynn
PATAY na nga nakaplagan ang usa ka babaye nga nadakin-as sa kilid sa sapa alas 6:45 sa gabii, Martes, Septyembre 10, 2024, sa Norala, South Cotabato.
Giila ang biktima nga si Nenita Buayan, 47-anyos, minyo, ug nagpuyo sa Purok El Kuda, Barangay Puti, Norala, South Cotabato.
Matud ni Norala Mayor Clementew Fedoc nga gikuha sa biktima ang sako sa basura sa sapa duol sa iyang gipuy-an apan wala damha nga nadakin-as kini hinungdan sa pagka-anod sa kusog nga bul-og sa tubig tungod sa pagbundak sab sa kusog nga ulan.
Abtik nga milihok ang mga sakop sa Municipal Disaster Risk Reduction and Management Office (MDRRMO) nga gipangulohan ni Aiza Lauro Gabion-Lim ug Kapitan Randy Gardose alang sa search and retrieval operation.
Taud-taod lang ang milabay ang nakit-an ang biktima nga nasangit sa gamot sa kahoy ubos nga bahin sa sapa.
Gidala dayon ang biktima sa Norala District Hospital apan gideklara kini sa doktor nga dead on arrival human nabunal sa bato ang iyang ulo ug nalumos.
Nagpasidaan si Mayor Fedoc sa iyang mga nasakupan nga mag-amping kanunay ilabi na nga ting-ulan karon. (EEF)
