Sen. Imee Marcos, nakapungtot kalpasan a nakitana a narugit ti Mariano Marcos Memorial Hospital and Medical Center iti siudad ti Batac
abyasa
LAOAG CITY – Nakapungtot ni Sen. Imee Marcos kalpasan a nakitana a narugit ti Mariano Marcos Memorial Hospital and Medical Center iti siudad ti Batac.
Daytoy ket kagiddan ti panagbisitana iti pannakaselebrar ti 107th Birth Anniversary ti amana a ni dati a Pres. Ferdinand Marcos Sr. ita nga aldaw, Setiembre 11.
Segun ken ni Sen. Marcos, sagpaminsan laeng daytoy a bumisita iti nasao nga ospital ngem kanayon nga awan dagiti nangangato nga opisial ken doktor.
Inbatadna a masapol a pagtalinaeden ti kinadalus gapu ta nakababain daytoy.
Kunana a nasken nga ipangpangruna ti kinatalged iti salun-at dagiti pasiente iti ospital.
Kabayatanna, kalikagum ni Sen. Marcos a maipababa ti presio ti bagas ditoy pagilian babaen iti naiget a pannakikoordinarna iti Department of Agriculture.
