Ben Madilynn
Naluwas sa tino nga kamatayon ang usa ka 34 anyos nga lalaki nga niambak sa viaduct sa South Road Properties (SRP), Dominggo sa kaadlawon, Septiyembre 8, 2024, human nabangalan kini sa usa ka mananagat sa Barangay Pooc, siyudad sa Talisay.
Ang biktima residente kini sa Barangay Mambaling, dakbayan sa Sugbo nga niadto sa viaduct sa SRP dayong ambak sa dagat, sumala sa usa ka 20 anyos nga lalaki nga nakasaksi sa hitabo.
Atol sa imbestigasyon sa Waterfront Police Station 3 sa dakbayan sa Sugbo nga misaksi siya og party sa Plaza sa Sugbo ug samtang nagkalingaw ang mga tawo sa maong party, niduol kaniya ang lalaki ug namalihog nga gunitan ang iyang cellphone nga niadtong tungora nag-live sa iyang Facebook account.
Gigunitan niini ang cellphone apan natingala nalang ang saksi nga samtang naghawid siya sa cellphone, kalit lang kini nga miambak sa dagat sa pagtuo niini nga maligo lang.
Apan sa wala pa kini moambak, namalihog nga ihatag ang iyang cellphone kung kinsa ang mo-claim niini ilabi na sa iyang kabanay.
Iya pa kini nga gisuwayan sa pagpugong ug gibadlong nga dili moambak apan wala na kini maminaw kaniya.
Ang tanang panghitabo na kita ug nabati sa Facebook live sa biktima gani iya pa kini nga gitawag nga mobalik apan nawala lang kinig kalit sa dagat.
Dali nga nangayog pakitabang ang 20 anyos nga lalaki sa police station ug ila dayon kini nga gi alarma.
Milusad dayon og search and rescue operation ang Philippine Coast Guard pinaagi sa pagsawom sa dagat ilawom sa viaduct apan naabtan nalang sila og alas 10 sa Domingo sa buntag wala na nila kini makita.
Apan nakadawat og tawag sa telepono ang Waterfront Police Station 3 sa pagka alas 10 sa buntag gikan sa Talisay City District Hospital nga dunay nalandig nga tawo sa ilang tambalanan nga napalgan sa kadagatan sa maong syudad.
Dali nila kini nga gisusi ug nasuta nga ang maong biktima mao kadto ang miambak sa viaduct sa SRP. Nabangalan diay kini sa usa ka mananagat alas 6 sa buntag nga mao nay nagdala kaniya sa tambalanan.
Rason matod pa sa biktima nganong nahimo niya ang pag-ambak sa dagat tungod sa kadaghan sa iyang problema.
Ang maong 34 anyos nga lalaki dunay tulo ka anak ug giingong naputos siya sa problema sa kinabuhi ug miangkon nga naka-inom siya atol sa iyang pag ambak sa dagat./AYB
