Ben Madilynn
Angayan lang nga mitahan sa iyang kaugalingon ang pangulo sa Kingdom of Jesus Christ (KOJC) nga si Pastor Apollo Quiboloy ug sa laing upat ka mga lider sa KOJC niadtong Dominggo sa gabii, Septiyembre 8, 2024.
Sa katapusan, si Quiboloy mi-’face the music’ human sa iyang taUdtaod nga pagtagotago
Ang pag-surrender ni Quiboloy mahulagway nga husto nga lakang ug maisip nga epektibong paagi nga kahatagan og higayon nga ipamatuod ang iyang pagka-inosente o madungog ang iyang habig, ilabi na sa mga pasangil nga gibato kaniya.
Ingon man ang pag-atubang sa maong sumbong ngadto sa appropriate forum sa hapsay nga paagi.
Nasayran nga sud sa duha ka semana nagkampo ang kapulisan sa compound sa KOJC nahimutanga sa Buhangin, Davao City sa katuyoan nga dakpon si Quiboloy, gani gihatagan og 24 oras nga ultimatum sa kapulisan ug gipasidan-an nga kon magmagahi si Quiboloy rumbohon ang building diin gidid-an ang mga polis nga makapaduol.
Kon nahitabo pa ang pagronda posible nga dako ang kadaot o ang gikabalak-an nga mamahimong duguon ang operasyon.
Si Quiboloy ug ang ubang akusado adunay arrest warrant sa kasong human trafficking, child ug sexual abuse nga gisang-at sa kanhi mga miyembro sa KOJC.
Samtang ang US Federal aduna sab arrest warrant batok sa pastor nga giluwatan niadto pang Nobiyembre 10, 2021.
Apan sa laing kalambuan ang kagamhanan mitataw nga nasikop si Quiboloy ug laing upat ka tawo sukwahi sa matod pa mi-surrender, kay ang labing importante anaa na sa kustodiya sa gobiyerno ang tawo nga ilang gihulagway nga idlas.
