Matteo Guidicelli and Sarah Geronimo “better together”

Sa loob ng apat na taong pagsasama bilang mag-asawa, sinabi ni Matteo Guidicelli na ang pagpapakasal kay Sarah Geronimo ang itinuturing niyang best decision niya sa buhay.

Ayon kay Matteo, si Sarah ang kabuuan ng katuparan ng pinapangarap niyang makasama habambuhay.

“Marriage is the best thing in life. Once you found your partner in life, solid ka dun, tuluy-tuloy ang buhay mo.

“Marami siyempreng ups and downs, pero pag may communication at pag-ibig, yun ang pinakaimportante.

“Sa lahat ng mga pinagdaanan mo, may kasama ka palagi, so yun ang pinakamaganda,” nakangiting pahayag ni Matteo nang nakapanayam siya ng PEP.ph (Philippine Entertainment Portal) sa Preview Ball 2024, na ginanap sa Manila Marriot Hotel noong Biyernes ng gabi, September 6, 2024. .

Puring-puri rin ni Matteo kung gaano kabuting asawa si Sarah.

“As a wife, very good, the best. Lahat ng pangarap ko nasa kanya.

“Mabait si Sarah, we learn from each other every day.”

Inulit ni Matteo na hindi ibig sabihin ay perpekto ang kanilang relasyon.

“It’s not always a bed of roses, it’s not always perfect. But we learn from each other’s ups and downs.

“At the end of the day, we become better people together and that’s important,” sabi niya.

Sa pinakaaabangang pagpapamilya nina Matteo at Sarah, anumang oras naman daw ay hinihintay lang ng mag-asawa ang pagkalooban sila nito.

“Baby? Oo, siyempre. Anytime,” simpleng saad ng aktor.

MATTEO ON UNANG HIRIT & PROJECTS WITH SARAH

Si Matteo ay isa sa regular host ng Unang Hirit, ang early morning public affairs program ng GMA-7. Pero marami ang nakapansing madalas absent si Matteo sa programa.

Siniguro ni Matteo sa PEP na bahagi pa rin siya ng Unang Hirit.

“Medyo absent tayo these past two weeks in Unang Hirit, ’cause marami, marami pang trabaho.

“I’ve been in Davao yesterday [September 5], maraming activities,” paliwanag niya.

Ang tinutukoy niya ay ang regional concert tour nila ni Sarah sa Mati, Davao Oriental.

Pagbabalita pa ni Matteo, “We’re planning different things with Sarah, we’ll see next year.

“Pero tuluy-tuloy pa rin with GMA Public Affairs for Unang Hirit every day. We are planning other things so it’s exciting.”

Masaya rin si Matteo sa nabuong pagkakaibigan nila ng mga kasama sa Unang Hirit.

“Okay, sila Ate Susan, si Boss Igan, si Boss Ivan, silang lahat,” tukoy niya kina Susan Enriquez, Arnold “Igan” Clavio, at Ivan Mayrina.

“It’s very nice to spend time with them in the morning, marami akong natututunan.

“Sa ABS mga artista ang kasama ko. Dito sa GMA mga news anchors, public affairs ang mga kasama ko,” nakangiting pahabol ni Matteo.